എന്തൊക്കെ ബഹളമായിരുന്നു. ഹര്‍ഭജന്‍റെ സ്പിന്‍,സഹീറിന്‍റെ പേസ്, ധോണിയുടെ തന്ത്രം, യൂസഫിന്‍റെ കുന്തം,തേങ്ങാക്കൊല, ഒലക്കേടെ മൂട്.........വേള്‍ഡ് കപ്പ് നേടാന്‍ പോയ 'ടീം ഇന്ത്യ' , തോറ്റ സങ്കടം തീര്‍ക്കാന്‍ ബാറില്‍ പോയി ആരാധകരുടെ കയ്യില്‍ നിന്നും ആവശ്യത്തിലധികം 'നേടി' കരീബിയന്‍ മണ്ണില്‍ നിന്നും മടങ്ങി.
അല്ല, ഈ ബാറില്‍ പോയതില്‍ എന്താണ് തെറ്റ്? നമ്മുടെ മാധ്യമ സിന്‍ഡിക്കേറ്റുകള്‍ പറഞ്ഞു പരത്തുന്നത് പോലെ അവര്‍ പബ്ബില്‍ പോയത് കുടിച്ചു കൂത്താടാനൊന്നുമായിരുന്നില്ല. കളിച്ചു ക്ഷീണിച്ചപ്പോള്‍ ദാഹം തീര്‍ക്കാന്‍ ഇത്തിരി നാരങ്ങാ വെള്ളം കിട്ടുമോന്നറിയാന്‍ പോയതാ. നാരങ്ങാ വെള്ളം തലയ്ക്കു പിടിച്ച ഏതോ ചില മണ്ടന്മാര്‍ (ആരാധകര്‍ എന്നും പറയാം) കൂവുന്നത് കേട്ട് വെറുതെ ഇരുന്നാല്‍ ആര്‍ക്കാ അതിന്‍റെ നാണക്കേട്? നമ്മുടെ രാജ്യത്തിന്. അതുകൊണ്ട് നമ്മുടെ രാജാവും യുവരാജാവുമൊക്കെ ഒന്ന് പ്രതികരിച്ചു. അത് ഇത്ര വലിയ തെറ്റാണെന്നൊന്നും എനിക്ക് തോന്നുന്നില്ല. പിന്നെ ഇങ്ങനെ ഒരു കാര്യം നടന്നിട്ടേയില്ല എന്ന് യുവരാജാവ് ട്വീറ്റിയതായി അറിഞ്ഞു. വേണ്ടതും വേണ്ടാത്തതും ട്വീറ്റാന്‍ പോയി പണി കിട്ടിയ നമ്മുടെ മന്ത്രിയുടെ അവസ്ഥ യുവരാജാവിന് വരല്ലേ എന്നാണ് ഇപ്പോള്‍ എന്‍റെ പ്രാര്‍ത്ഥന.
ഇനി കളി തോല്‍ക്കാനുള്ള കാരണം. അതിന് ബി.സി.സി.ഐ യുടെ പ്രത്യേക അന്വേഷണ കമ്മീഷന്‍ ഒന്നും വേണ്ട. അത് എനിക്കറിയാം. തോറ്റ ഉടനെ ഇന്ത്യയുടെ സ്കോര്‍ കാര്‍ഡും കൊണ്ട് ഞാന്‍ നമ്മുടെ അനന്തന്‍ അജ്ഞാതനെ കണ്ടിരുന്നു. റണ്‍ റേറ്റും വാഗണ്‍ വീലും നോക്കി അദ്ദേഹം ഗണിച്ചു പറഞ്ഞത് വച്ച് നോക്കിയാല്‍ ഇന്ത്യന്‍ പരാജയത്തിനു കാരണം ദൈവകോപമാണ്. എങ്ങനെ കോപിക്കാതിരിക്കും? ലോകത്തിലെ മുന്നൂറ്റിമുക്കോടി ദൈവങ്ങളുടെയും പരമ ഭക്തനായ ശ്രീശാന്തിനെ ടീമില്‍ ഉള്‍പ്പെടുത്താതിരുന്നാല്‍ അവര്‍ കോപിക്കില്ലേ?ചില പരിഹാര ക്രിയകള്‍ ചെയ്‌താല്‍ മാറുന്നതേ ഉള്ളൂ ഈ പ്രശ്നങ്ങള്‍. അതിലൊന്നാമത്തേത് നമ്മുടെ ശ്രീശാന്തിനെ ടീമിലെടുക്കണം എന്നത് തന്നെ. പിന്നെ ഗ്രൌണ്ടിന് ചുറ്റും നാല്പത്തൊന്നു ശയനപ്രദക്ഷിണം, പിച്ചിനു നടുവില്‍ ഒരു ഗണപതി ഹോമം തുടങ്ങിയ ചില്ലറ ക്രിയകള്‍ വേറെയും.
എവിടെ കളി തോറ്റാലും കമന്റിടാന്‍ ധാരാളം ആള്‍ക്കാര്‍ കാണും. മുന്‍ കോച്ച്,മുന്‍ ക്യാപ്റ്റന്‍ തുടങ്ങി ആയകാലത്ത് ബൌണ്ടറി ലൈനില്‍ പന്ത് പെറുക്കി നടന്നവര്‍ വരെ അഭിപ്രായം പറയും.ഇവര്‍ക്കൊന്നും അറിയാത്ത ഒരു കാര്യമുണ്ട്.സൂപ്പര്‍ എട്ടിലെ ഇന്ത്യയുടെ എല്ലാ തോല്‍വികള്‍ക്കും ന്യായീകരണങ്ങളുണ്ട്.
ഇന്ത്യ ആദ്യം തോറ്റത് ഓസ്ട്രലിയയോട്. സായിപ്പിനെ കാണുമ്പോള്‍ കവാത്ത് മറക്കണം എന്നുള്ളത് പാരമ്പര്യമായി ഇന്ത്യന്‍ ടീമിന് കിട്ടിയ അറിവാണ്. അതിനനുസരിച്ച് മാത്രമേ ടീം കളിക്കാന്‍ പാടുള്ളൂ.
രണ്ടാമത് തോറ്റത് വെസ്റ്റ് ഇന്‍ഡീസിനോട്. അവരുടെ നാട്ടില്‍ ചെന്ന് അവരെ തോല്‍പ്പിക്കുന്നത്‌ ശരിയാണോ? അതിഥി മാത്രമല്ല,ആതിഥേയരും ദേവോ ഭവ...
ഇനി ശ്രീലങ്കയോട്. നിന്നെപ്പോലെ നിന്‍റെ അയല്‍ക്കാരനെയും സ്നേഹിക്കുക എന്ന് മഹാന്‍മാര്‍ പറഞ്ഞിട്ടുണ്ട്. നമ്മുടെ അയല്‍ രാജ്യത്തെ തോല്‍പ്പിച്ച് നാം ജയിച്ചിട്ടെന്ത് കാര്യം? അങ്ങനെയൊരു ജയം നമുക്ക് വേണ്ട എന്ന് കളിക്കാര്‍ക്കും തോന്നിക്കാണും...
ഇനിയാരും ടീമിനെ കുറ്റം പറയാന്‍ പാടില്ല. കോച്ച് പലതും പറയും. കളിക്കാര്‍ മടിയന്‍മാരാണെന്നും തടിയന്‍മാരാണെന്നുമൊക്കെ. അതൊക്കെ വെറുതെ പറയുന്നതാ.ഈ മടിയും തടിയുമൊന്നും ഐ പി എല്ലില്‍ കണ്ടില്ലല്ലോ? ഇനി കളിക്കാന്‍ വേണ്ടി തടി കുറക്കാനൊന്നും നമ്മുടെ കളിക്കാര്‍ തയ്യാറാവുമെന്ന് എനിക്ക് തോന്നുന്നില്ല. മുന്‍പ് ചെയ്തത് പോലെ കോച്ചിനെ അങ്ങ് മാറ്റിയാല്‍ പ്രശ്നം തീര്‍ന്നില്ലേ...
ഇനിയും കുറേ ടൂര്‍ണമെന്റുകള്‍ വരുന്നുണ്ട്. ഈ ടീമിന്റെ ഗതി എന്താകുമോ എന്തോ? കാത്തിരുന്നു കാണാം............
തട്ടിയും തടഞ്ഞും വീണ്ടും ഏതെങ്കിലും ഒരു കപ്പ് നേടിയാൽ ഇതെല്ലാം മറന്ന് വീണ്ടും പവനായിയെ തോളിലേറ്റും ഇന്ത്യയിലെ വിണ്ഡികളായ 110 കോടി ജനങ്ങൾ അല്ലാതെന്ത് കാണാൻ...
ReplyDeleteഇടയ്ക്ക് ഇങ്ങനെ ഒക്കെ ഓരോ തോല്‍വികള്‍ നല്ലതാണെന്നേ...
ReplyDeleteഇന്ത്യ ആദ്യം തോറ്റത് ഓസ്ട്രലിയയോട്. സായിപ്പിനെ കാണുമ്പോള്‍ കവാത്ത്മറക്കണഎന്നുള്ളത്...................................................................................................................................................................നമ്മുടെ അയല്‍ രാജ്യത്തെ തോല്‍പ്പിച്ച് നാം ജയിച്ചിട്ടെന്ത് കാര്യം? അങ്ങനെയൊരു ജയം നമുക്ക് വേണ്ട എന്ന് കളിക്കാര്‍ക്കും തോന്നിക്കാണു
ReplyDeleteകൊള്ളാം,വളരെ കൃത്യമായ നിരീക്ഷണം..
കോച്ചിനെ അങ്ങ് മാറ്റിയാല്‍ പ്രശ്നം തീര്‍ന്നില്ലേ...
ReplyDeleteശ്രീ....
ReplyDeleteഇടക്കൊക്കെ തോല്‍വി നല്ലതാ............ പക്ഷെ എപ്പോഴും തോല്‍വിയും ഇടക്കൊക്കെ ജയവുമാകാതിരുന്നാല്‍ മതിയായിരുന്നു..
krishnakumar513.... thanks